Y Diweddaraf am y SiopNEWydd - 01.08.2023

Ers ein bwletin diwethaf oedd yn rhoi gwybod am ein cais llwyddiannus am grant Perthyn, rydyn ni am eich hysbysu am ein gwaith ers hynny.

Roedd 3 maes i’r grant hwn:-

1.Gyda chymorth y Plunkett Foundation, cynhaliwyd asesiad cynhwysfawr o’r polisïau presennol, gan gynnwys amodau cyflogaeth, trefniadau iechyd a diogelwch, canllawiau i wirfoddolwyr a threfniadau a gweithdrefnau rheoleiddio eraill.  Mae’r gwirfoddolwyr Michele a Mags wedi cynnal llawer o’r adolygiad hwn ac rydyn ni am ddiolch iddyn nhw am eu hymdrechion amhrisiadwy. Mae’n golygu y gallwn ni fod yn hyderus bod gennym ni lywodraethiant da ar waith bellach, a’n bod ni’n barod ar gyfer y siop newydd.

2. Rydyn ni’n agos bellach at gwblhau cynllun busnes strategol cynhwysfawr ar gyfer trosglwyddo i’r SiopNEWydd. Cafodd hwn ei baratoi’n annibynnol gan ymgynghorwyr busnes o gwmni Landsker yn San Clêr. Unwaith y bydd hwn wedi’i gwblhau bydd yn cael ei gynnwys fel elfen hanfodol ym mhob cais grant cyfalaf mawr rydyn ni eisoes yn paratoi i’w cyflwyno i ariannu’r datblygiad.

3. Roedd y trydydd maes cymorth o dan y grant hwn ar gyfer datblygu brandio a marchnata newydd i’r SiopNEWydd. Roedd hyn er mwyn adolygu a darparu templedi ar gyfer cynlluniau copi caled a digidol, gan gynnwys arwyddion a gwaith hyrwyddo.  Yn anffodus, er gwaethaf ymdrech sylweddol, nid oeddem yn llwyddiannus wrth geisio dod o hyd i gwmni addas i ddarparu gwasanaeth dwyieithog o fewn y terfyn amser caeth oedd ar gael i wneud cais am yr elfen honno o’r cyllid.  Fodd bynnag, os gall unrhyw un argymell cwmni dilys, byddem ni’n falch o’u hystyried yn y dyfodol.

Rydyn ni’n gwerthfawrogi bod y cynnydd o bell yn ymddangos yn araf, ond gallwch chi fod yn hyderus bod llawer iawn o waith yn cael ei wneud i sicrhau bod gennym ni’r dull mwyaf proffesiynol a chynhwysfawr posibl o ymdrin â cheisiadau grant a fydd yn ei dro yn rhoi’r cyfle gorau i ni gyflawni ein nodau.